貴為公認對世界影響最深o既選舉 -- 美國總統大選晌今年11月後第一個星期一後o既星期二又o黎。本應係全球每4年最熱話題o既總統大選今年竟然俾金融海嘯搶去風頭...唔講，有幾多人知原來大選下個禮拜就到？

      不過好正常，香港人都係短視o既。大家只會探討一年半載內o既問題(係有遠見o既，香港股市就唔駛變質到短炒先係正路，長線投資被視為邪魔外道啦)。雞蛋就覺得今次全球金融體系能否盡快恢復健康。其中一個重要o既因素乃係取決於美國總統究竟係奧巴馬(Barack Obama)定係麥堅(John McCain)...

      簡單而言，美國總統除左可以任意發動戰爭之外(憲法上當然美國總統並不能夠話打就打， 但小布殊(George W. Bush)晌2003年發動o既伊拉克戰爭就實例示範俾大家睇咩叫一意孤行、隻手遮天)，事實上由於三權分立：行政、司法、立法相互制衡，總統係受到一定o既制抓。但，假如美國眾、參兩院對總統提出o既要求及法案等都大開綠燈，總統行事便能無往而不利。反之，如法案未能得到眾、參兩院贊成，美國總統就有如紙老虎，乜Q都做唔到又或者唔駛做。到時真係搵阿茂去做都無乜相干。

      1993年，政敵同僚皆稱為天才o既克林頓(Bill Clinton)初登總統寶座，雄心萬丈，矢志為美國帶來一返新景象、誓要拯救美國經濟於水深火熱之中。但奈何滿腔熱血敵不過共和黨(Republican Party)議員o既反對票。上任頭3年成事不足但就醜聞不絕。1996年克林頓終於搵到問題徵結所在：共和黨人晌國會為多數派，無佢地支持真係10個諸葛亮(當然佢未必會知邊個係諸葛亮)都無用武之地。逐痛定思痛，決心踏出前所未有o既路：第三條路(The Third Way)，並取得空前成功，令美國經濟再度飛翔。(註：黃毓民晌特首答問大會上話第三條路係英國工黨(Labor Party)晌98年首先提出。雞蛋並不完全反對，但如果話先行者為克林頓則更為適合也~)

      15年後o既今日，4年前重要議題 -- 恐怖主義(Terrorism)成為綠葉陪襯，經濟再度成為總統大選最最最重要o既議題。咁究竟係奧巴馬定係麥堅有助經濟復甦？雞蛋認為考慮因素有2：

(1) 現在民主黨(Democratic Party)為眾、參兩院大多數派，假若自己友奧巴馬當選，為令市民覺得民主派做到o野，增加兩年後o既國會選舉優勢，理論上推行經濟政策時應該暢通無阻。而假若麥堅當選的話，除非佢可以好似克林頓咁行第三條路，否則克林頓上任後頭3年o既歷史不難重覆。

(2) 最理想o既總統應該自信得o黎帶點謙虛。既要晌作出重大決定前，抱開明態度徵詢幕僚意見，於下決定時刻，自信果斷；又要合乎中庸之道(西方哲學家口中o既Golden Mean)，有自信，但不能自大、謙虛，但不能依賴。但《時代》週刊(Time)剛晌上期就詳細報導原來麥堅火爆已經係公開o既秘密。每每遇到政見不合時就發老爛爆粗拍台乜都齊務求令到對方接受自己o既意見。但，國會上o既自由黨人會唔會因為你老人家拍拍台(一頭白髮o既佢都7張有2了)，驚你心臟負荷唔o黎就賣你賬呢？唔係個個政客都係好似我地o既特首咁，俾人扔條蕉就即刻乖乖乜都應承咖嘛...

      全球經濟以美國馬首是瞻。港幣同美元掛勾，更加有唇亡齒寒之虞(《財富》雜誌(Fortune)仲話可以透過金融衍生產品賭美國會唔會破產，你都咪話唔驚)。美國一日搞唔返好D經濟，唔好理全球，淨係我地香港都要仆直。所以求神拜佛，麥堅，你2000年都叫玩過下總統選舉(當年o既麥堅就好似今次o既希拉莉(Hillary D R. Clinton)咁，黨內初選都過唔到， 輸o左俾現任美國總統布殊)，今年不如都係算罷啦....

雞蛋